اعترافات

\

أنا مدمن .. مدمن شغل وعمل ومش بعرف أبقى فترة بدون اني أعمل حاجة،بحب اشتغل جدًا في الحاجه اللي بحبها، واللى مش بحبها – ممكن اديها شوية اهتمام أقل – لكن كوني بحب الشغل جدًا بيخليني اعمل أي حاجة تقريبًا.

\

مجموع الثانوية بتاعي كان نقمة أكتر من كونه نعمة وحسنة في حياتي – طبعًا الحمد لله – لكن انا كنت حابب أدرس الفيزياء والفلك وكمان علم الأحياء – عارف اني طماع بس دى الحقيقة ودول أكثر 3 مجالات بحبهم – ولكن يشاء القدر بالرغم من محاولات كثيرة في جميع الاتجاهات ولكنها في النهاية أدت بي الي كلية لم أفكر بها ولو لمرة في حياتي، ولعل الله له حكمة في ده. طبعًا كنت لسه صغير بردو، فبالرغم من الطموح والشغف والعند لكني سمعت كلام أهلي ودخلت كلية يدعوها قمة. مش هقول انى مندمتش، بالعكس ندمت كتير ولكن في المقابل قدرت أعمل حاجات كتيرة جدًا ومنها هوايتي المفضلة تقريبًا وهي الشغل.

تقريبًا حاليًا بتعلم لوحدي الإدارة نظريًا و عمليًا. بحب أنفذ مشاريع جدًا، جديدة ومنوعة في أكثر من مجال ويا حبذا لو لها علاقة بالعلوم، وحرفيًا أعشق اني اتفرج عليها وهي شغالة وناجحة وبتكبر يوم بيوم، الموضوع بالنسبالي أشبه باللي بيعزف على البيانو في أول تعلم كل عزف جديد؛ الموضوع بيكون صعب شوية، بس بعد ما أخلص المشروع، و أشوف المشروع ناجح و الناس مبسوطة، بعشق استمتع بفرجة عزف المقطوعة دي وهي بتتعزف .

\

بخاف من طموحي الزايد، عايز أعمل حاجات كتير جدًا، لدرجة إني بحس إن سقف طموحاتي طار مني ومش هلحق اعمل حاجة – بالرغم من كوني 21 سنة -والوقت بيجري بسرعة أوي.دايمًا بسأل نفسي أنا عملت إيه و نفعت كام واحد ونادرًا ما بشعر بالرضى من اللى عملته، ودى حاجة حابب اعترف بيها وهي اني صعب أرضى نفسي، صعب حاجة تعجبني، كل ما بقرب من هدف، بيكبر مني قبل ما أوصله، فلما بوصله بشوفه صغير ومش بيعجبني غالبًا.

دائمًا ما أقول لنفسي "إذا لم تفعل شيئا لتخبر العالم من تكون، سيتولى العالم تلك المهمة، وسيخبرك من تكون، وفى الغالب لن تحب ذلك، لذلك ابدأ انت أولًا"عندما تفعل ذلك، وأنا أفعل ذلك، والجميع يفعل ذلك، لن يخبرنا احد اننا العالم الثالث، لأننا إن لم نكن العالم الأول، هنكون الأول مكرر على الأقل. ::D